Matthew 1
Vatiamal Onen Iesu a
1Koanik vi sise onen vati avu keil onen Iesu Kristo, koa vi havinali asuv houlu Deved telamu, koa havinali Ebraham telamu.2Ebraham, kei vi tata onen Aesak,
koa vi tata onen Siekob,
koa vi tata onen Sudah ka tunali keil.
3Sudah, kei vi tata onen Peres ka Siera, koa mama onealu vi Tamar.
Ka Peres, kei vi tata onen Hesron,
koa vi tata onen Ram.
4Ram, kei vi tata onen Aminatap,
koa vi tata onen Nashon,
koa vi tata onen Salmon.
5Salmon, kei vi tata onen Boas, ka mama onen vi Rehab.
Ka Boas vi tata onen Obed, ka mama onen vi Rut.
Ka Obed vi tata onen Tiese,
6koa vi tata onen asuv houlu Deved.
Asuv houlu Deved, kei vi tata onen Solomon, ka mama onen vi vatina onen Uraea.
7Solomon, kei vi tata onen Rehoboam,
koa vi tata onen Abitsa,
koa vi tata onen Asa.
8Asa, kei vi tata onen Sehosavat,
koa vi tata onen Sehoram,
koa vi tata onen Usaea.
9Usaea, kei vi tata onen Siotam,
koa vi tata onen Ehas,
koa vi tata onen Hesekaea.
10Hesekaea, kei vi tata onen Manase,
koa vi tata onen Amon,
koa vi tata onen Sosaea.
11Ka Sosaea, kei vi tata onen Sekonaea ka tunali keil,
en avong me-Babilon keil umai alah lat me-Isrel keil uva en out Babilon.
12Netan vi vati avu keil koa akatau en avong me-Isrel keil uva en out Babilon:
Sekonaea, kei vi tata onen Seltil,
koa vi tata onen Serubabel.
13Serubabel, kei vi tata onen Apiut,
koa vi tata onen Eliakim,
koa vi tata onen Asor.
14Asor, kei vi tata onen Sadok,
koa vi tata onen Akim
koa vi tata onen Eliud.
15Eliud, kei vi tata onen Eliesar,
koa vi tata onen Matan,
koa vi tata onen Siekob.
16Siekob, kei vi tata onen Siosep,
koa vi meatin onen Meri,
koa vi mama onen Iesu,
koa vi Kristo koa Ahi vat kati vit hesani.
17Sakini, navong avuli vati avu keil onen Iesu, Ebraham rokol asuv houlu Deved, avotini keke avi teindan ehat (14). Ka en avong onen Deved rokol avong me-Isrel keil uva en out Babilon, avotini keke vati avu keil onen Iesu avi teindan ehat (14). Ka en avong me-Isrel keil uva en out Babilon rokol avong Kristo avasi, vati avu keil onen avi teindan ehat (14) emun.
Hasuen onen Iesu Kristo b
18Koanik vi tunien ten asa koa kur out mulamu en hasuen onen Iesu Kristo. Meri, mama onen, asak koe tuai keke vahi ahin onen Siosep. Ka navong Siosep rovatei veah vesesal veni, avotini keke Meri meas en titiali tuai. Ka koanek vi tounah koa Ninin Votut mumoni. 19Ka ven Siosep, meatin onen Meri, sakien keil onen mal, kei mundemi keke luhekeka veni Meri mumon sakien koa romaltei. Ka enrovattei vasakin Meri vamemou en meten meatin keil, sakini, kei mundemi vit keilu luhekeka raeng enges.20Ka navong Siosep mul veah rendem tounah keil enek, angelo tai onen Ahi Asuv kistal mini en matil vovoien tai ka viteni mini vit, “Siosep, havinali asuv houlu Deved telamu, konametautei keke kovakur Meri vahi ahin onom, ven titiali koa kei meas eni ka ven Ninin Votut. 21Meri hekuri hehi meahos, ka keik kiling isen 'Iesu', koa aneite teni vi 'Iahova mutut meatin', veni kei houtut meatin keil onen ran tisaen keil one.”
22Tounah vasi enek kur out vasakin selusien koa Ahi Asuv viteni ka en provet onen mai vahi anatin koa vit,
23“!Mihelonge! Ahin hau tai koa reingeingen meatin veah
hemeas en tivava.
Evus, hekuri hehi meahos ka iling isen hehi 'Imanuel',
koa aneite teni vi 'Ahi ro ven ir'.”(Aes 7:14)
24Navong Siosep muli mea, kei mumon asa koa angelo onen Ahi Asuv meng kati mini. Kei va ven Meri ka kuri mai ro teim sen. 25Ka kei romatiltei vatal mini rokol avong koa Meri kur natnali. Ka Siosep ling isen Iesu.
Copyright information for
PMA